काठमाडौं । एकै परिवारले दुई खर्ब ८६ अर्ब रुपैयाँबराबरको क्रिप्टो तथा हुन्डी कारोबार गरेको छ । काठमाडौंको बागबजारका रुपेश श्रेष्ठ र उनको परिवारले यस्तो धन्दा चलाएको हो ।
प्रहरीले रुपेश, उनकी श्रीमती रचना शर्मा, भाइ दिपेश श्रेष्ठ, भान्जा अंशुल श्रेष्ठलाई प्रतिवादी बनाएर दुई अर्ब ८६ रुपैयाँ बिगो बराबरको मुद्दा दायर गरेको छ । रुपेशका अर्का भान्जा आयुष श्रेष्ठको समेत कारोबारमा संलग्नता थप अनुसन्धान भइरहेको छ । उनीहरूमध्ये दिपेश र अंशुल अमेरिकामा बसेर नेपालमा हुन्डी र क्रिप्टो कारोबारमा संलग्न रहेको दाबी गरिएको छ ।
आइतबार जिल्ला अदालत काठमाडौंमा दायर गरेको मुद्दामा १७ जनालाई प्रतिवादी बनाइएको छ । जसमध्ये रुपेशसहित पाँचजना पक्राउ परेका छन् । रुपेशसहित आशिष अग्रवाल, मीनबहादुर जिसी, कुमार परियार र झनीन्द्रप्रसाद खतिवडालाई प्रहरीले पक्राउ गरेको हो । १२ जनालाई फरार प्रतिवादी बनाइएको छ ।
भारतीय नागरिक विमल पोद्दारसहित नुवाकोटका शरद भट्टराई, धादिङका वीरेन्द्र मगर, सुनसरीका बिगलसिंह शर्मा, सिन्धुलीका ओमकुमार श्रेष्ठ, स्याङ्जाका दीपक शर्मा, रामेछापका वङ्देन फुन्सोक लामा, नवलपरासीका गोविन्द श्रेष्ठ र रामेछापका रुदे तामाङलाई फरार प्रतिवादी बनाएर मुद्दा दायर गरिएको छ । गिरोहका नाइकेमध्ये एक भारतीय नागरिक पोद्दार हुन् । उनी यसअघि सुन तस्करीमा पक्राउ परी छुटेका थिए । डेढ महिनाअघि विमानस्थलमा बरामद भएको डेढ किलो सुन तस्करीको घटनामा पनि उनी मुछिएका छन् ।
गत ६ मंसिरमा काठमाडौं बागबजारबाट पक्राउ परेका रुपेशमाथि अनुसन्धान गर्ने क्रममा पोद्दारसहित १७ जनाको संलग्नता पुष्टि भएको र अरू एक धेरै व्यक्तिमाथि थप छानबिन गर्नुपर्ने औँल्याएको छ । गिरोहका नाइकेमध्ये एक श्रेष्ठलाई ब्युरोले ९९ लाख रुपैयाँसहित पक्राउ गरेको थियो । बागबजारस्थित उनको घरबाट ८९ लाख ६९ हजार नेपाली रुपैयाँ र अमेरिकी डलर सात हजार २६ बरामद भएको थियो । उनले घरमा पैसा गन्ने मेसिनसमेत राख्दै आएका थिए । उनको हुन्डी कारोबारको खाता नै बरामद गरी प्रहरीले विस्तृत अनुसन्धान गरेको थियो । जसमा सबैभन्दा धेरै अमेरिकाबाट उनले अवैध कारोबार गर्दै आएका थिए । बयानको क्रममा उनले आफूले हुन्डी कारोबार गरेको स्विकारेका छन् । प्रहरीले दुई खर्ब ८६ अर्बको बिगो बनाएकोमा उनले थोरै मात्र कारोबार गरेको दाबी गरेका छन् ।
प्रहरीका अनुसार रुपेशले ३५ वटा तथा आशिषले १२ वटा वालेटमार्फत क्रिप्टो कारोबार गर्दै आएका थिए । उनीहरूविरुद्ध संगठित अपराध र राष्ट्र बैंक ऐनअनुसार क्रिप्टोको कसुरमा कारबाही माग गरिएको छ ।
यो समूह नेपालमा हुन्डी र क्रिप्टोको कारोबार गर्ने सबैभन्दा ठूलो समूहमध्ये भएको प्रहरीले जनाएको छ । तर, यसमा जोडिएका अरू धेरै व्यक्तिको हकमा भने प्रहरीले विस्तृत अनुसन्धान गर्न सकेन । रपेशका भान्जा आयुष श्रेष्ठ, भारतीय नागरिक सतीश शर्मा, सञ्जय उपाध्यायलगायत धेरै व्यक्ति तथा केही व्यापारिक घरानासँग कारोबारको विवरण ल्यापटप तथा रजिस्टरमा फेला परेको थियो । उनीहरूमाथि दोस्रो चरणमा सिआइबीले अनुसन्धान गर्दै छ । यो घटनाले देशमा कालो अर्थतन्त्र हुन हदसम्म बढेको छ भन्ने प्रष्ट भएको छ ।
