काठमाडौं । गत शुक्रबार दुई जना युवाहरुको ज्यान जाने गरी बालकुमारीमा भएको घटनालाई लिएर सुर्खेतको वीरेन्द्रनगरमा आन्दोलन चर्किएको छ । उनीहरुले गृहमन्त्री नारायणकाजी श्रेष्ठ र भौतिक पूर्वाधार तथा यातायात मन्त्री प्रकाश ज्वालाको राजीनामा माग गर्दै आन्दोलनलाई उग्र बनाएका छन् ।
शुक्रबार ललितपुरको बालकुमारीमा कोरिया भाषा परीक्षाको विवादलाई लिएर ईपिएस कार्यालय घेर्न गएका प्रदर्शनकारीमाथि प्रहरीले गोली चलाएको थियो । सो घटनामा प्रहरीले चलाएको गोली लागेर दैलेखका २३ वर्षीय सुजन रावत र अछामका २२ वर्षीय वीरेन्द्र शाहको मृत्यु भएको थियो ।
सो घटनालाई लिएर आज (आईतबार) वीरेन्द्रनगरमा युवाहरुले आन्दोलन चर्काएका हुन् । उनीहरुले मुख्य सडक चक्काजाम गरेका छन् । सोही घटनालाई लिएर हिजो पनि प्रदर्शन भएको थियो । प्रर्दशनकारीहरुले राज्यले जबरजस्ती प्रदर्शन दवाउन खोजे जुनसुकै अप्रिय घटना घट्नसक्ने चेतावनी दिएका छन् ।
