काठमाडौं। सरकारको सिफारिसमा रिगल भनिने गुन्डा नाइके योगराज ढकाललाई राष्ट्रपतिले आममाफी दिएको निर्णय उल्ट्याइदिएपछि अरू निर्णयमा समेत प्रश्न उठेको छ।
नेपालगन्जका चेतन मानन्धरको हत्या अभियोगमा जन्मकैद फैसला सुनाइएका रिगल भनिने योगनाथ ढकाललाई सरकारको सिफारिसमा राष्ट्रपति रामचन्द्र पौडेलले संविधान दिवसको अवसरमा कैद मिनाहा गरिदिएका थिए।
तर, ‘रिगल’ जघन्य अपराधमा संलग्न भएकाहरू जसले उन्मुक्ति पाएका थिए, उनीहरूको निर्णयमा समेत प्रश्न उठेको हो।
राजनीतिक दबाब र प्रभावमा परेर तीन वर्षअघि छुटेका नेपाल तरुण दलका तत्कालीन चितवन जिल्ला अध्यक्ष शिव पौडेलको हत्यामा दोषीहरूबारे समेत प्रश्न उठेको छ।
उनको हत्यामा दोषी ठहर ठहरिएका फणीन्द्र श्रेष्ठ, दिलबहादुर मोक्तान र सुनिल केसीले पनि २०७७ मा प्रजातन्त्र दिवसको अवसरमा कारवास छुट पाएका थिए।
उनीहरूले २०६८ पुसमा चितवन जिल्ला कारागारभित्रै तरुण दल चितवनका तत्कालीन अध्यक्ष शिव पौडेलको हत्या गरेका थिए । यी तीनै जनालाई तत्कालीन प्रधानमन्त्री केपी शर्मा ओली सरकारले कैद मिनाहा सिफारिस गरेको थियो।
तर सरकारको सिफारिसमा राष्ट्रपतिले अधिकारको दुरुपयोग गर्दै गम्भीर प्रकृतिका अपराधमा दोषी ठहर भएकालाईसमेत कैद सजाय मुक्त गरिदिएको भन्दै तत्कालीन समयमा विरोध भएको थियो।
आफ्ना श्रीमानका हत्यारालाई आममाफी दिइएको भन्दै पौडेलकी श्रीमती विना पौडेलले आपत्ति जनाएकी थिइन् । उनले आफ्ना कार्यकर्ता भएकै कारण उनीहरूलाई आममाफी दिएको गुनासो गरेकी थिइन्।
अहिले योगराज ढकाललाई दिइएको कैद मिनाहा उल्टिएपछि चितवनका शिव पौडेलकी श्रीमती विना पौडेलले पनि न्याय पाउने आशा राखेकी छिन्।
उनी भन्छिन्, ‘‘दोषीलाई सजाय मुक्त गरिएपछि न्यायप्रति विश्वास टुटेको थियो। अहिले उस्तै मुद्दामा रिगल जेल परेपछि अपराध गर्नेले दण्ड पाउँछ भन्ने विश्वास पलाएको छ। मैले पनि न्याय पाउँछु भन्ने लागेको छ।’’
पछिल्लो पाँच वर्षमा योगराज ढकाल ‘रिगल’ जस्तै ६ हजार ७ सय ४६ जघन्य अपराधमा संलग्न भएकाहरूले उन्मुक्ति पाएका छन्।
२०७६ यता राजनीतिक दबाब र प्रभावमा परेर १ सय ३५ आममाफीसहित ६ हजार ७ सय ४६ जनाले कैद मिनाहा पाएका छन्। जुनसुकै अपराध संलग्न भएकालाई सरकारले आममाफीसहितको कैद मिनाहा गरिरहेको छ ।
